ஒரு மிடறு தேநீர்

வாகனங்களினிடையே சிக்கிய
இருள்
ஒரு மிடறு தேநீர்

அலுவலகத்திலேயே விட்டு வந்திருக்க வேண்டிய
அயர்ச்சி
ஒரு மிடறு தேநீர்

மகளுக்கு வாங்கித் தர நினைத்த பொம்மை
ஒரு மிடறு தேநீர்

அடுத்த சம்பளத் தேதி
ஒரு மிடறு தேநீர்

மனைவியுடன் காலையில் போட்ட
சண்டை
ஒரு மிடறு தேநீர்

போன மாதம் சென்று பார்த்திருக்க வேண்டிய
குட்டி மருமகள்
ஒரு மிடறு தேநீர்

ஊர்விட்டு ஊர்வந்து கிடைத்த
நட்புகள்
ஒரு மிடறு தேநீர்

இரவு நேரம் மனம் கரையப் பாடிய தோழரின்
குரல்
ஒரு மிடறு தேநீர்

காதலியின் நேரம் மறந்த தொலைபேசி
உரையாடல்கள்
ஒரு மிடறு தேநீர்

தோளில் சாய்ந்து அழுத தோழியின்
முகம்
ஒரு மிடறு தேநீர்

முதல் முதலாக மது அருந்த சொல்லிக் கொடுத்த
கல்லூரி சீனியர்
ஒரு மிடறு தேநீர்

கினற்றில் நீச்சல் பழகும் போது காலில் கோடு கிழித்த
கல்
ஒரு மிடறு தேநீர்

பார்வையாலேயே வகுப்பை அமைதியுறச் செய்யும்
ஒன்பதாம் வகுப்பு வாத்தியாரின் மீசை
ஒரு மிடறு தேநீர்

மிகவும் பிடித்த பால்ய வகுப்பின்
வசந்தா டீச்சர்
ஒரு மிடறு தேநீர்

சுடச் சுட அம்மா ஊட்டிய
நெய்ச் சோறு

காலியான கோப்பையிலேயே
தேங்கிவிடுகிறது கடைசி மிடறின் தித்திப்பு
நாளையும் தேநீர்கடைகளை நோக்கி
கால்கள் நகரும்படிக்கு